بعد ٣ سنين حكـايـات أسمـا ×1
لكنهم ما كانوش يعرفوا…إنهم أول ما يرجعوا من المصيف…هيلاقوا ناس غريبة ساكنة في البيت…
والصدمة الحقيقية لسه ما بدأتش.
يتبع…لايـك وسيبلـي كومنـت وهـرد عليكـم باللينكـ بعـد شـوية وقـت صـغيرين _ حكـايـات أسمـا السـيد
الفصل الثاني
أول حاجة عملتها سارة لما وصلت بيتي كانت إنها شالت ليان من حضني.
قالت وهي بتبصلي بقلق:
“إنتي وشك أصفر يا ريم… إنتي محتاجة ترتاحي.”
لكن أنا ما كنتش حاسة بأي حاجة غير البرودة.
برودة المطر…
وبرودة الخذلان.
دخلت أوضة الضيوف، وقعدت على الكنبة وأنا ببص لبنتي وهي نايمة بعد ما شربت الرضعة.
كل شوية كنت أفتكر صوت حماتي وهي بتقول:
“البيت ده بيت عيلتنا.”
وأضحك ضحكة صغيرة كلها مرارة.
لو كانت عارفة الحقيقة…
ما كانتش قالت الكلمة دي.
رن موبايلي.
كانت نادية.
رديت بسرعة.
قالت بحماس:
“الراجل وافق.”
رفعت رأسي.
“بالسرعة دي؟”
قالت:
“هو أصلًا كان مستني منك موافقة. الراجل اسمه فارس الحديدي… صاحب مجموعة حديدي للاستثمار العقاري. كان معجب بالفيلا جدًا، ومستعد يحول الفلوس كاش أول ما يشوف الورق.”
قلت بهدوء:
“يبقى نخليه يشوف الورق.”
…
بعد ساعتين…
كنت قاعدة في مكتب محامي العيلة.
الأستاذ حسام.
راجل في أواخر الخمسينات، يعرفني من وأنا طفلة.
أول ما شافني داخلة ببنت صغيرة وجسمي لسه مرهق، قام من مكانه.
قال بقلق:
“ريم… إيه اللي حصل؟”
حكيتله كل حاجة.
من أول الباب اللي اتقفل…
لحد المكالمة.
فضل ساكت دقيقة كاملة.
وبعدين خبط بإيده على المكتب.
وقال بغضب:
“الناس دي فاكرة نفسها فوق القانون؟”
طلع ملف كبير من الخزنة.
فتح العقد.
وحطه قدامي.
وأشار على أول صفحة.
“اسم المالك…”
ابتسمت.
“ريم الشاذلي.”
قلب الصفحة التانية.
“طريقة السداد…”
“تحويلات من حسابك الشخصي.”
الصفحة التالتة.
“إقرار قبل الزواج إن الفيلا ملك خاص لا تدخل ضمن أي حقوق زوجية.”
رفع عينه وبصلي.
“حتى لو فضلتوا متجوزين مية سنة… محدش يقدر ياخدها منك.”
أخدت نفس طويل لأول مرة من ساعة اللي حصل.
قال:
“تحبي نرفع قض..ية؟”
هزيت راسي.
“لأ.”
استغرب.
“ليه؟”
ابتسمت بهدوء.
“أنا عندي عقاب أحسن.”
…
في نفس الوقت…
كان كريم قاعد على شاطئ الساحل.
لابس نضارة شمس.
وبيضحك مع أمه.
قالت له وهي بتشرب العصير:
“قولتلها إيه؟”
ضحك.
“ولا حاجة… خليتها تعرف حجمها.”
